balagtas.org

ORAS NG SENADO

Matatawang madidismaya ka sa mga pagdinig at malayang talumpating paugong ng Senado.

Walang kinahihinatnan, wala kundi makumbinse ka ng namamayaning pakiwari.

Dating balwarte ito ng mga estadistang nagsusulong ng kapakanang pambansa at kagalingang pampubliko.

Sa kasalukuyan, tila imposibleng makasilip ng katiting na senyal ng paglitaw ng isang Claro M. Recto o sinumang kapanahon niya.

Sadyang imposible raw, dahil pananagutang pansarili at pampartido ang puno at dulo ng existence ng Senado ngayon.

Pero mainam-inam ito kompara sa Kamara ng mga Representante. May ilang Senador na matalas ang isip, sintalas ng patalim na laan sa patraidor na pagsaksak.

Ang Kamara kasi ay batbat lang ng rubber stamp ng Malakanyang.

Dahil gayon kung magpatay ng oras ang Senado, sa alaala mo na lang binubuhay ang statesmen sa dakong ito ng mundo.

KAUNA-UNAHANG BABAE SA MUNDO NG MGA LALAKI

Ang salin ng lahi at kapangyarihan
ay pinagsama ko sa paglalarawan.
Sa texto ng akda, isang matang bulag
ang ibig sabihin ng salitang "pisak."
Iyan ang nag-inspire para itong berso
ay buuin bilang kisapmatang kwento.
Ngayon po bahala na kayong magmatyag
at mag-analisa SA MUNDO NG BULAG:

Sa mundo ng bulag na mga lalaki,
lumitaw ang isang pisak na babae.
Dahil sa pangalan, hipo, halimuyak
ay hinirang siyang reyna ng liwanag.
Pagkat nagkareyna, dapat magkahari;
sa pinakabata siya nagpalahi.
Anang nangaiwan sa pangungulila:
"Ang babae dito madagdagan sana."
"Kailangang bago tayo mamayapa,
mabawasang muli ang mga binata."
"Sa ano't anuman, pasalamat tayo;
hindi kumakapa ang dumating dito."
Sabihin pa nga bang ang mundo'y nagdiwang
nang ibalita na: "Reyna'y nagsisilang!"
Umuha ang batang haring tatanghalin--
malaki, malusog, makisig, at duling.

PUSO NG POKPOK

Pinarating at ipinasuri sa balagtas.org ng isang Dolores Dina Flores ang tula ngayong PUTANAGA:

"Malalamog ding gaya
ng katawang nabilad,
ang puso ko'y sumama
sa saplot na hinubad."

Bagay ang pamagat: pag-atake sa problemang isasatinig, ang mekanikal na karanasang karnal.

Sa pamagat pa lang, inatake agad ang problema sa karanasang karnal.

Ayaw na ng puta na umasang may lalaking tunay na magmamahal sa kanya.

Mapuwersa ang imaheng nalikha ng 2 huling linya. May titis ng himagsik ang hinagpis, tila pagtiwalag sa "lamog" na kalagayang matutuyot.

Matatag na nagamit ng awtor ang pormang tanaga: mabilis, malakas at mabisang narendahan ang tema.

(LEA)

SI 'BULAGSAK' AKA 'AKSAYA' SA LILIM NG AKASYA

"Bulagsak" si Atanacio, mapag-aksaya (mapagsayang) ng pera o kabuhayan. Nagbenta ng lahat ng sariling ari-arian, nakalilim sa akasya si Aksiyong Aksaya. Pakonsuwelo niya sa buhay ang salitang "saya" (glad) na nakakabit sa alyas niya. Para siyang "lagsak"--bunton ng sukal o basura. Naging "bulag" si Atanacio sa pagpili ng gawaing gagampanan. Nagpakaadik kasi sa kaliwa't kanang bisyo. Todo"bagsak" siya. Masasabi rin na kakulay ng lilim ang kanyang kamalayan.

TUNGKOL SA POETIKA NG LIRIKA
(Ika-2 sa serye)

ni LAMBERTO E. ANTONIO

Taglay ng piyesa ang mga pamilyar na sangkap sa maharayang paglalakip, gaya ng "amihan" at "habagat."

Ang literal na kahulugan ng mga iyan ay nalikha bilang mapagpahiwatig na kabatirang makirot: "bulaklak na matalim ang hugis," na bahagi ng tanawing rural.

Nakasalig sa tagisan ng memorya at olvido ang tematikong tirada.

Ipinaloob sa "Berso Buhat sa Baryo" ang dalawang panahong pantumbas sa tagisan (tag-araw at tag-ulan): isang dula ng matimyas na lumipas at mapait na kasalukuyan.

Imahinasyon ng makata ang tanghalan; mula sa imahinasyon, lumipat-lumapat sa damdamin ang dula, at vice versa. (TATAPUSIN)

TUNGKOL SA POETIKA NG LIRIKA (Huling Bahagi)

ni LAMBERTO E. ANTONIO

Mayorya ng aking mga tulang liriko nabuo sa sandali ng pangungulilang nagbunsod para mai-concratize ang creative solitude.

Dapat pansinin: nag-uulit ako ng mga salita't imaheng nagamit ko sa ibang sariling tula. Gayunman, iba ring kabatiran ang umiigkasmula sa mga estropa ng partikular na bagong piyesa.

Ihambing ang " Berso Buhat sa Baryo" sa mga lirikong tulang kabilang sa aking mga aklat ng tula, para makita ang kaibahan.

Ang diskurso, o mga notasyong ito ay malinaw na nagpapanukala: Tugunan ang problema ng bawat tulang isasalang sa workshop, na liriko, siksik ang structure pero buhaghag ang emosyon.

BALIKBARYONG METRO KID

Bakit nagkaganito? Maghapong nagsusugal ang matatanda. Magdamag tumotoma ang kabataan.

Nahihiwagaan ba sila sa akin pag ginigrit ko sila? Putris, iisa lang naman ang wika namin.

Teka, baka naiwan ko sa Metro ang itsura ko. O dinadaya ko'ng pandinig nila.

Dito na lang siguro sa liblib ako muling bababa. Sa dakong ito ng nayong sinilangan, medyo enjoy ako.

Pa-installment, ibinabalik dito ng simoy ang nakahahawang tawa ng mga kababata kong matagal nang patay.

(Beloy Lonero)

BUHAY PA, EMBALSAMADO NA

Depende sa life style ang haba at ikli ng buhay ng tao. Kuwestiyon iyan ng kalusugan.

Regular ba'ng exercise? Walang bisyo? Anong food ang kinokonsumo? Sagot dito sa huli, you are what you eat.

Nutrition ang tuon. Anang kasabihan, kumain ka ng gulay para humaba ang iyong buhay.

Tama iyan, noong di pa pineperwisyo ng elementong kemikal ang kalikasan.

Eh ngayon? Laos na raw ang paggamit ng likas na fertilizer. So, "pampalusog" sa aanihing pananim na gulay ang ibinombang sobrang pestisidyo.

Fresh tingnan, pero buhay pa eh...embalsamado na, kung baga.

Ay, buhay; wala na yatang ligtas kainin ang modernong tao. Kaya halos magkatabi lang ang duyan at hukay.

(Celing Labuyo)

PAPEL NG KONSEHAL SA KONTRATANG LAWAY

Isang konsehal, Nago Aguilar ng barangay P. sa Cabiao, N. Ecija ang naging "tulay" pahantong sa kontratang laway.

Sabi ito ng latest "victim" ng "kontratistang Ruel Gamboa" na isinumbong dito sa balagtas kamakailan.

Sabi pa ng victim (ayaw ipabanggit ang ngalan): pinsan ng misis niya si konse Nago. Kahit nakatango na silang mag-asawa sa mas kilalang kontratista, kay Gamboa nila ibinigay ang trabahong ayos-bahay. Rekomendado ito ng konse.

Nang ibitin ng suspek ang trabaho at di na sumipot pagkakuha ng perang pambili ng gamit, may nagsabing marami nang niloko si RG.

"Konse, tulungan mo sana akong bawiin yung pera," panawagan ng victim kay Aguilar.

Ibig daw niyang isiping pati si Nago ay "nagoyo" ng suspek. Pero sanggang dikit umano ang dalawa.

May Nago, este, Agno River na di laway ang umaagos; ewan kung may tulay roong madadapuan ng puting uwak, sabi ng balagtas sa victim.

CORRUPTION AY 'INSPIRASYON'

Most corrupt sa Asia at 8th most corrupt sa buong mundo ang Pilipinas, ayon sa Transparency International at World Bank na nagranggo sa mga bansa.

Nagunita ng Balagtas ang mga makata ng ibang bansa na kabulukan ng lipunan ang naging "inspirasyon" sa pagsulat.

Humalaw ang Balagtas sa isang piyesa at pinamagatang ISANG BANSANG NABUBULOK. Angkop marahil sa RP ang sumusunod na estropa:

Tahimik na gubat ang pinupuno ng buwan
ng mga larawan ng mga patay na bayani.

O lilik na buwan!
Sa batuhang nakapaligid
yumayakap ang pag-ibig:
pangitain ng panahong napabantog.

Asul na liwanag:
patungo sa siyudad ng lahing nabubulok,
iginagayak ang madilim na kinabukasan ng kanilang mga apo.
O buwan, balot ka ng anino--
nagbubuntong-hininga sa basyong kristal
ng lawa sa kabundukan.