balagtas.org

Sakit ang pagtanda: taglay ng sinuman mulang pagsilang. Ito ang naisaloob ng isang baog na nakibertdey sa kapitbahay.

Ayon sa isang "taliba ng moralidad," maibabalik ang delikadesa kung palalakarin para maghanap ang suhol.

Walang mas mapanganib kaysa nakasulat na alaala ng pag-ibig.

Walang kasinsarap ang tulog ng misis na nagsasalita sa pananaginip. Nagising ang mister, dumagok sa unan dahil ang narinig ay ibang pangalan.

Na masigalot ang isyu sa reproductive health dahil lang sa kontrahan ng science at relihiyon ay huwag isipin ng sinumang nag-menopause.

Tutol sa buhay na pinaghaharian ng poot, payag tayo na alipinin ng pag-ibig.

Maligayang pagtanda ang bati ng buhay sa sinumang may pagkakataon para muling pumatay ng 8,760 oras.

DISKURSO SA USO

Pakaisipin nga ang salitang "uso"
at ang nakikitang mga pagbabago:
ayos ng paligid, tahanan at tao
na kung kilatisin ay umaasenso.

Nangyayari ito at dapat asahang
kasama talaga sa takbo ng buhay;
ang hindi humirit para umagapay,
mahaba ang tulog tiyak sa kangkungan.

Malimit mangyaring agad dinededma
ang usong sa tingin ay wala nang kwenta,
imbes na ingatan, ibinabasura
ang naturang api kinawawang moda.

Kulang ng pag-arok sa katotohanang
may cycle o ikot ang usong mabuhay;
anuman ang moda sa kasalukuyan,
may antigong padron na pinanggalingan.

DISKURSO SA USO (2)

May napahahatak sa trend o sa uso
na di nagsusuri ng puno at dulo,
tipong gaya-gaya na over masyado,
patoks na patoks daw ang pagkamoderno.

Daming naghihikaw na lalaking bagets,
sapagkat nauso ano'ng namamasid?
Hikaw-hikaw nila ay ikinakabit
pati na sa ilong at tabi ng bibig.

Ang pagbabago ba'y senyal ng pag-unlad?
Sagot eh depende sa uri at antas.
Siyang nasa kubo simputi ng tagak,
pagdapo sa mansion biglang naging uwak.

Sumuso sa uso, labis ang lunggati,
nabundat sa rangya, naglibag ang budhi;
super materyoso, may bayad ang ngiti
kaya amo't amoy ay laging salapi.

Susubukan dito na mapagsalubong at mapagdugtong ang mga palagay ng indibidwal at publiko. Mabisang gamit ang panulat. Sa bagay na ito, ang balagtas ay bantay talakay sa kultura, na tula ang isang tagasagisag. Bale pantay salakay, halimbawa'y sa mall ng masamang tinapay at teritoryo ng tarpulinang pambalot ng tinapa.