DISKURSO SA USO
Pakaisipin nga ang salitang "uso"
at ang nakikitang mga pagbabago:
ayos ng paligid, tahanan at tao
na kung kilatisin ay umaasenso.
Nangyayari ito at dapat asahang
kasama talaga sa takbo ng buhay;
ang hindi humirit para umagapay,
mahaba ang tulog tiyak sa kangkungan.
Malimit mangyaring agad dinededma
ang usong sa tingin ay wala nang kwenta,
imbes na ingatan, ibinabasura
ang naturang api kinawawang moda.
Kulang ng pag-arok sa katotohanang
may cycle o ikot ang usong mabuhay;
anuman ang moda sa kasalukuyan,
may antigong padron na pinanggalingan.
