balagtas.org

Talastasan tayo. Lumikha ng dagdag na tulay. Ok dito pataasan ng ihi. Huwag lang pataasan ng pader.

Kaysa ipasipat sa iba ang guhit ng sariling palad, itanong mo mismo sa kamay mo ang iyong kapalaran.

Sa dami ng maaaring ipakahulugan sa "wastong pagkain" problema natin ang pagpasan sa mga lingkod ng bayang halal at appointed na may maling kaisipan dahil kulang sila sa mental nutrition.

Ano kung matinik nang malalim sa paglakad na matulin at lubugan ng araw sa paglakad na mabagal? Mas kapuri-puri iyan kaysa mamalaging nakagayak habambuhay.

Buhat sa pangarap ang bawat layunin
na lagi at laging dapat puliduhin,
sapagkat totoong sa hasik na hangin
buhat din ang bagyo na takdang anihin.

PAGBABAGO

Nangyayari ito at dapat asahang
kasama talaga sa takbo ng buhay,
ang hindi humabol para umagapay,
mahaba ang tulog tiyak sa kangkungan.

Bumibilang ang taludtod
ng sariling anyo't tibok:
naghihinga ng pantustos
sa pagsinta't pagkapoot.

Higit na madaling langit ang abutin kaysa nasa tabing kalampasang-tingin.

Sobrang masalita kung magbalita ang broadcast media. Pag inedit ay pangalan lang ng tagapag-ulat ang matitira. Tila di sobrang pintas ito. Ang sakto ay binerdugo ng broadcast at print ang Filipinong "bukod." Nakakubabaw sa bangkay ng salitang iyan ang "maliban."

ISANG ABISO

Hinahangad naming makapaglarawan ng gayo't ganitong diskarte sa buhay, gaya ng pagbilang sa sisiw-sisiwan kahit di pa pisa ang itlug-itlugan.