MGA TALATANG SAMPAY-BAKOD
Sundan natin siya sa daang matuwid
kung ang dulo'y hindi banging sakdal-tarik.
Ang langit higit na madaling abutin
kaysa nasa tabi ngunit lampas-tingin.
Pagdantay ng mister na napakainit,
magdadalang-tao na naman ang misis.
Habang bata dapat maglinis-linisan
upang sa pagtanda'y maging politician.
Pinakamamahal? Kabuuan ito
ng iba at ibang baka minahal mo.
May theory na kaya nagbigti si Hudas
ay palsipikado ang pabuyang pilak.
